Rusiya dəyişəcək

Posted by on 12 December, 2011
This post was filed in Razi Nurullayev, Yazılar and has no comments yet
1
Razi Nurullayev

Razi Nurullayev, AXCP sədrinin Xarici Əlaqələr üzrə müavini

Rusiyada keçirilən Duma seçkiləri bu ölkənin həyatında yeni bir dönəm yaradıb. Hazırda Rusiyada baş verən proseslər gələcək siyasi dəyişikliklərin müjdəçisidir. Rusiya xalqına ayılmaq və siyasi prosesləri dərindən analiz etmək üçün bir gün də bəs etdi. Seçkidən bir gün sonra, 200 nəfəri bir yerə toplaya bilməyən müxalifət 10 min adamı küçələrə çıxara bildi. Hal-hazırda, Rusiyada proseslər Tunis və Misir senarisi üzrə getməyə başlayıb. Bu o deməkdir ki, Rusiyanın sosial şəbəkələrində görünməmiş fəallıq başlayıb. Bütün ruslar bloqçu və internet müjdəçisi olmağa qədəm qoyub. Ruslar arasında siyasiləşmə elə sürətlə gedir ki, Sosialist İnqilablarının banisi Leninin inqilab uğurları Rusiyada yenidən təkrarlana bilər.

Proseslər gələn ilin martında baş tutacaq seçkilərə qədər elə vəziyyət ala bilər ki, bu da baş nazir Vladimr Putinin prezident seçkilərində asan qələbə qazanmayacağını deməyə əsas verir. Rusiyada 2007-ci ilin seçkilərində də ciddi qanun pozuntuları olmuşdu. Ancaq o zaman siyasi partiyalar müqavimət hərəkatı yaradıb saxtakarlıqlara qarşı mübarizə apara bilməmişdilər. İndi, Ərəb inqilabları ilə başlayan yeni dünya düzənində vəziyyət başqadır. Hazırda Rusiyada baş verənlərin ciddi xarakter alacağı qaçılmazdır. Çünki, küçəyə çıxmaq istəyən etirazçıların sayı günbəgün artır.

4 dekabr Duma seçkiləri göstərdi ki, rus xalqı Putinə müsbət münasibət bəsləmir. Boynumuza almalıyıq ki, Putin böyük nüfuza malik idi. Ruslar onu yeni Rusiyanın yaradıcısı kimi görürdülər. Ancaq bu seçkilər göstərdi ki, ruslar daha Putinə qarşı bu münasibəti bəsləmirlər. Ona görə də, 2012-ci ilin prezident seçkilərinin Rusiya üçün böyük təlatümlər yaşadacağını deyə bilərik. Putin asanlıqla birinci turda prezident ola bilməyəcək. Hətta, hadisələr elə cərəyan edə bilər ki, seçkiyə qədər olan hadisələr Putini prezidentlikdən məhrum etsin.

ABŞ dövlət katibi Hillari Klintonun Rusiyada keçirilən Duma seçkilərini “ədalətsiz və qeyri-şəffaf” adlandırması, doğurdan da Rusiyanın baş nazırı Putinin dediyi kimi ölkədəki siyasətçilər üçün bir “siqnal” rolunu oynadı. Düzdür, Rusiyada baş verən proseslərdə ABŞ-ın rolunun olması hələlik inandırıcı görünməsə də, Rusiyada baş verən proseslərdə “ərəb baharının” qoxusu hiss olunmaqdadır. Maraqlı hal burasındadır ki, bu cür seçkilərdən sonra Rusiya artıq Ərəb ölkələrinə, Cənub-Şərqi Asiya ölkələrinə demokratiya dərsi, xarizmatik lider olmaq, xalqın sevgisini necə qazanmaq dərsini keçə bilməyəcək. Artıq birmənalı demək olar ki, Rusiyanın beynəlxalq hadisələrə təsir imkanları zəifləyəcək. Putinin də bəyənatları əvvəlki qədər rezonans və təsir yarada bilməyəcək.

Amma, fakt faktlığında qalır ki, Rusiyada Putini hələ də ürəkdən istəyənlər və sevənlər var. Çünki, məhz, Putin Rusiyada qayda-qanun yaratmaq, ərazi bütövlüyünü təmin etmək, daxili etnik münaqişələri susdurmaq, dövlətin büdcəsini fantastik rəqəmlərə çatdırmaq, Rusiyanıın keçmiş liderliyini özünə qaytarmaq, dünyanın ən böyük səkkizlərinə düşmək və s. məsələləri həll edə bilib. Buna görə də hələ ki, o keçmiş “xidmət”lərinin kölgəsində bir müddət özünü qoruya biləcək. Amma aydındır ki, yeni dünya düzənində dəyişiklik yaratmadan əvvəlki kimi idarə etmək mümkün deyil.
Rusiya, yəni Putun iki yol ayrıcından birini seçməlidir: ya Rusiyada demokratik dəyişikliklərə cığır açaraq, Rusiyanın dəyişməsinin məsuliyyətini öz üzərinə götürmək və bununla bərabər, Rusiyanın və dünyanın sevimlisi olaraq qalmaq; ya da dirəniş göstərərək, ərəb ölkələrinin taleyini yaşamaq. Birinci variant Rusiyanın baş nazirinə M.Qorbaçov taleyini yaşada bilər. O, anlamda ki, O, dünyada gedən proseslərə nüfuz etmək şansını saxlaya bilər.

Rusiya dəyişəcək. Rusiyanın dəyişməsi MDB dövlətlərinə də demokratiya və azadlıq bəxş edəcəkdir. Hamımız gözləyirik!

0
You can follow any responses to this entry through the RSS 2.0 feed. You can leave a response, or trackback from your own site.

Leave a Comment